منتدى أول ديجيهاية حريمى بدمياط
 
الرئيسيةالرئيسية  دى جى رؤىدى جى رؤى  التسجيلالتسجيل  دخولدخول  
للإستعلام أ / محمد حماده 0107256806 / 0128200117
ام رؤى حماده ترحب بكم وتتمنى لكل الاعضاء قضاء وقت ممتع معنا
ندعوكم لزيارتنا دائما لمتابعه كل ماهو جديد وممتع لدينا
بشرى ساره لعرايس الاسكندرية فرع جديد لدى جى رؤى بالإسكندرية
تنبيه هام : نحذركم من التعامل مع اى شخص بخلاف ام رؤى حماده او ابو رؤى ( محمد حماده ) ليس لنا مندوبين ونحذركم من التعامل مع الوسطاء او المتعهدين او منظمى الحفلات

شاطر | 
 

 أم رؤى حماده أول ديجيهايه حريمى بدمياط

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
محمد حماده
Admin
Admin


ملك المنتدى
عدد المساهمات : 194
الموقع : دمياط

مُساهمةموضوع: أم رؤى حماده أول ديجيهايه حريمى بدمياط   الجمعة 17 ديسمبر 2010, 1:39 pm

نقلا عن احدى المنتديات النسائيه
قصه نجاح أم رؤى حماده
اول ديجيهايه حريمى بدمياط
وقصه نجاح مشروعها
واليكم اللقاء




ما اجمل ان نتابع قصه نجاح امرأه مصريه فى عملها
خاصه لو كان فى مجال له طبيعه خاصه مثل
هذا المجال
مجال يدخل الفرح والبهجه على الناس فى ليله العمر والمناسبات الاسريه الجميله
وهو مجال
الدى جى






الان
هانتعرف على قصه


أول ديجيهايه حريمى بدمياط

ام رؤى حماده

اتفضلى يا ام رؤى عرفينا بنفسك
وازاى بداتى مشوارك مع العمل فى الدى جى




بسم الله الرحمن الرحيم


اولا احب اعرفكم بنفسى

الإسم ام رؤى محمد حماده

السن 28 سنه

حاصله على بكالوريوس خدمة اجتماعيه

متزوجه ومقيمة فى دمياط

عندى بنوته واحده وهى وش السعد والهنا عليا

مجال عملى بشتغل فى مجال الدي جى

أنا اول سيده فى دمياط صاحبة دى جى
وبيطلق عليا

(أول ديجيهايه حريمى بدمياط )

وانا سعيده جدا باللقب ده
لانه بيدينى الاحساس انى فعلا حققت ذاتى
وحققت طموح مش فى خيال اى بنت توصله

وسبب ما بقول ان بنتى هى وش السعد عليا هتعرفوه من حكايتى


[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://www.facebook.com/profile.php?id=1080527782#!/group.php?gi
محمد حماده
Admin
Admin


ملك المنتدى
عدد المساهمات : 194
الموقع : دمياط

مُساهمةموضوع: رد: أم رؤى حماده أول ديجيهايه حريمى بدمياط   الجمعة 17 ديسمبر 2010, 2:06 pm

البدايه كنت من 2002 سنة تخرجى
كان املى وانا بدرس انى لما اخلص انى اكمل دراسات عليا او اكمل فى كليه طب واكون دكتورة نفسيه او انى ادخل اكاديميه الشرطة ولغايه سنه تخرجى كانو بيقبلو فى الاكاديميه اخصائيين اجتماعيين .

ولما اتخرجت روحت علشان اقدم لاقيت السنه دى العدد استوفى وفضلت اتابع لغايه سن 26 سنه وده اخر سن مسموح بيه فى الاكاديميه والمهم مكانليش نصيب.



وفى فترة بعد تخرجى روحت اشتغل فى ستوديو تصوير زى اى بنت
بتحجز صور للعرسان وبقص الشغل وبلزق الالبومات بس مش اكتر من ده وكان راتبى وقته 250 جنيه ومفيش طبعا اجازات وحضور من 10 الصبح لغايه 11 بالليل .



وفى يوم لاقيت صاحب الستوديو طلب منى انى اطلع مع زميلة ليا نصور فرح حريمى اتكسفت اوى واتحرجت جدا ولما روحنا الفرح وقفت فى جنب بعيد مكسوفه من الناس وحاسة ان كل الناس بتبصلى انا وبعدين زميلتى قالتلى امسكى الكاميرا وصورى كده ووقفت اصور كانت كاميرا هاند كام وكنت خايفة اوى
ولما رجعنا الستوديو المدام شافت الشريط وقالتلى يجيى منك
وفرحت اوى واديتنى 10 جنيه حساب التصوير
ومكنتش غرمت اى حاجه يومها المواصلات كانت على حساب زميلتى.



تانى مرة لاقيتهم بيقولولى جهزى نفسك انتى راحه تصورى فرح لوحدك
خفت اوى واترعبت معقول بسرعه كده وفعلا روحت لوحدى وكنت خايفه اوى
بس قرأت الفاتحه ودعيت ربنا انه ميخذلنيش وفعلا ربنا وقف جنبى
والمدام يومها جابت البنات وقالتلهم اتفرجو اهو ده التصوير ولا بلاش ومن يومها وانا كنت كل حفله بتفنن وبطلع امكانيات الكاميرا وكنت برضه باخد 10 جنيه بجانب مرتبى ومقولكوش ال 10 جنيه كنت بصرف منها مواصلات 4 جنيه ويتبقى لى 6 جنيه وروحت كل الاماكن البيوت والقاعات فوق السطح وفى افخم قاعات فى العنبر وفى الصيوان فى الخيم فالارياف وفى راس البر



لغايه ما جه يوم وحصل ان مامتى تعبت وبعتتلى زميله لها فى الشغل قالتلى مامتك محجوزة فى المستشفى ومحتاجه حاجات من البيت روحت لصاحب الستوديو وقولتله الظروف وانى عايزة استأذن علشان اروح لماما
تفتكروا قالى ايه
(لو خرجتى من هنا مترجعيش )
رديت وقولتله
( فى الف سلامه انت وشغلك )
ومن يومها سبت الشغل عنده



كملى يا ام رؤى


يتبع


[ندعوك للتسجيل في المنتدى أو التعريف بنفسك لمعاينة هذه الصورة]


عدل سابقا من قبل محمد حماده في الجمعة 17 ديسمبر 2010, 2:14 pm عدل 1 مرات
الرجوع الى أعلى الصفحة اذهب الى الأسفل
http://www.facebook.com/profile.php?id=1080527782#!/group.php?gi
محمد حماده
Admin
Admin


ملك المنتدى
عدد المساهمات : 194
الموقع : دمياط

مُساهمةموضوع: رد: أم رؤى حماده أول ديجيهايه حريمى بدمياط   الجمعة 17 ديسمبر 2010, 2:14 pm

نتابع لقاءنا مع
اول ديجيهايه فى دمياط

ام رؤى حماده

اتفضلى يا ام رؤى كلمينا عن المرحله التاليه
تابعت ام رؤى حديثها و قالت :


ودى كانت اول مرحلة فى حياتى

المرحلة التانيه

بدأت مع مقاول افراح مشهور جدا
كان على علاقة بصاحب الستوديو وحصل بينهم خلاف بناءا عليه فسخوا عملهم مع بعض والمقاول ده اتعامل مع ستوديو تانى وقفل هو وحده فيديو ميكسر وجاب مصورين وكان محتاج وحده تصور وسأل عنى لاقانى قاعده من غير شغل
كلم بابا ووصلى وكلمنى وروحت اصورله اول حفله حريمى وقالى انتى كنتى بتحاسبى بكام سوقت اللؤم عليه وقولتله 20 جنيه قالى انا هحاسبك ب 25 جنيه
وفرحت اوى وبلغنى مواعيد شغل كتير اصورهوله وفى اقل من سبع شهور اشتريت موبايل n70 ب 2125 جنيه ايامها
ياااااااااااه تخيلو كام شغله عملتها
ولسه معايا الموبايل ده عمرى ما هستغنى عنه لانه من تعبى وشقايا
اول مرة كنت اشترى موبايل من فلوسى
المهم بعد ما جبت الموبايل بابا قالى انا عايز اجيبلك كاميرا تصورى بيها بدل ما نشتغل عند الناس
قولتله خلاص تبقى شركة بينا انت بالخامات وانا بالمجهود والتشطيب !



ومن هنا بدأت المرحلة الثالثه

وبابا اشترالى كاميرا سونى ديجيتال هاند كام
واول حفله صورتها بيها لحسابى الخاص كانت بنت صاحبه ماما فى مسجد
وكنت محسباها ب 70 جنيه يا دوب اجرى وسعر الخامات
ومن هنا بدأت اعمل كروت واوزعها كانت برقم تليفون بابا مرضاش يحط رقمى
انانيه بئه
هههههههههه



فى الفترة دى عرفت حماده جوزى
بالرغم من انى كنت اعرفه من ايام ثانوى بس مكانش فى نصيب بينا
عارفين المقولة اللى بتقول
( إذا اردت شيئا بشده فأطلق سراحه فإن عاد إليك فهو لك وإن لم يعد لك فهو لم يكن لك من البدايه )
طبقتها
ومين على طول اتخطبنا
وعلشان حماده بيشتغل فى مجال الافراح بدأ يعملى دعايه واخدنى لناس اصحاب ستوديوهات اشتغل معاهم تصوير فيديو برضه
وفضلت اشتغل لغايه مشروعى ما كبر وبقى عندى كاميرات كتير واشتريت كاميرات من الكبيرة
زى اللى بيصورو بيها فى التليفزيون وبقيت

اول مصورة فى دمياط تتعامل مع الكاميرات الكبيرة

وكل الناس بتتعامل بالكاميرات الهاند كام الديجيتال وعلمت و شغلت معايا اخواتى البنتين لاننا 3 بنات بس لغايه ما واحده منهم اتخطبت وبطلت الشغل ودلوقتى اتجوزت
ومعايا اختى الصغيرة بتصور وانا بشطب الشغل وراها
فى الفترة دى كان فى اصحاب ديجيهات بيدورو على بنات تقف على الدى جى فى الافراح الاسلامى يادوب المطلوب منها تحط اسطوانه وتقعد
عجبتنى الفكرة اوى وكنت لما ببقى فاضيه كنت بروح اقف على الدى جى
وواحده واحده اتعلمت ازى انسق الاغانى وامكسها يعنى اعمل ميكسات
وكنت مابين التصوير فى مصلحتى وانى اقف على الدى جى عند الناس برضه
لغايه يوم جوازى
تخيلو فى عروسة تنزل تالت يوم فرحها تصور
انا عملتها
متجوزة السبت ونزلت يوم الاربع علشان اصور حنه وتانى يوم الخميس برضه اصور فرح نفس العروسة
اه والله
شوفتو الكفاح



كملى يا ام رؤى



يتبع


[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://www.facebook.com/profile.php?id=1080527782#!/group.php?gi
محمد حماده
Admin
Admin


ملك المنتدى
عدد المساهمات : 194
الموقع : دمياط

مُساهمةموضوع: رد: أم رؤى حماده أول ديجيهايه حريمى بدمياط   الجمعة 17 ديسمبر 2010, 2:22 pm

نتابع معا اللقاء المميز
مع الدى جى


ام رؤى حماده

وقصه نجاح مشروعها

كملى يا ام رؤى
كلمينا عن المرحله التاليه
من وقف بجانبك وما الصعوبات الى واجهتك؟


نيجى للمرحلة الرابعه فى حياتى

طبعا اتجوزت وجوزى طبعا وقف جنبى كتير لغايه ما بقيت اشهر مصورة فى دمياط
وبقيت بطلب بالاسم علشان اصور افراح وحنن واعياد ميلاد وسبوع وكل الحفلات
لغايه ما حملت
تخيلو وانا ف الشهر التاسع كنت بصور
اه والله
ومرة دخلت فرح وواحده حرجتنى بكلمة
قالتلى
( يا اختى متقعدى فى بيتك احسنلك بشكلك ده )
ويومها وقفت اصور وانا بعيط كتييييييييير وصعبت عليا نفسى اوى
حكيت لحماده جوزى عارفين قالى ايه
( انت هتنجحى وهيبقى ليكى اسم و صدقينى ان الله لا يضيع اجر من احسن عملا )
وجه ميلاد رؤرى بنتى8/2/2009 بعد عيد جوزاى ب 4 ايام




وجه يوم وحماده قالى مبقاش ينفع تشتغلى دى جى عند حد
انتى احترفتى ولازم يكونلك مشروعك وانتى بتطلبى كتير فى الافراح الاسلامى
ما تيجى نعمل دى جى


قولتله منين عد غنمك يا جحا قال واحده قايمه وواحده نايمه
هههههههههههههه
وكانت ماما قاعده بالصدفه
قالتلى انا عامله جمعيه لشوار اختك الصغيرة خديها اتفكى فيها وابقى قسطيلى لما الحالة تمشى معاكى واهو جاى على رزق بنتك رؤى
فرحت اوى
وبما ان خالتى فى اسكندريه وبنروحلها على طول
قولت اسأل عليه فى اسكندريه واجيبه من هناك
واقسم بالله العلى العظيم
مكملتش اسبوعين بعد الولاده وانا فى النفاس وسافرت اسكندرية
ولفيتها حته حته
لغايه ماعرفت ان ممكن اجمع من سموحه او شارع كنيسه الاقباط و شارع النبى دانيال فى محطة الرمل
وروحت هناك وجمعت دى جى كل اجهزة الصوت كامله لكن بدأت بسماعتين كبار بنسميهم فى شغلتنا دى تلاجتين
على اعتبار انها مقاس التلاجه الايديال 8 قدم



وسميت الدى جى

رؤى

على اسم بنتى تيمنا بيها



وعملت انا وجوزى المشروع ده شركه بينا والفيديو شركة ما بينى وما بين بابا

وعملت اول كارت عليه رقم تليفونى وتليفون حماده وطبعا علشان أكبر بزوجى كتبت الكارت
( دى جى رؤى المدير المسئول محمد حماده )
وأول موسم اشتغلته كان ماشاء الله عليه خرجت منه زودت 4 سماعات تانى موسم قفلت عده تانيه

وبدات اشغل اختى معايا على الدى جى علمتها وفهمتها الصنعه
وبقيت انا اقف على الدى جى واختى تصور وانا اشطب الفيديو بعدها




كملى حديثك يا ام رؤى
لنتعرف على المرحله التاليه

يتبع






[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://www.facebook.com/profile.php?id=1080527782#!/group.php?gi
محمد حماده
Admin
Admin


ملك المنتدى
عدد المساهمات : 194
الموقع : دمياط

مُساهمةموضوع: رد: أم رؤى حماده أول ديجيهايه حريمى بدمياط   الجمعة 17 ديسمبر 2010, 2:33 pm

نتابع لقاءنا مع

اول ديجيهايه حريمى فى دمياط

ام رؤى حماده


والمرحله التاليه فى قصه نجاحها فى مشروعها


كملى يا ام رؤى
سالتها
كيف كان لشخصيتك اثر فى تنميه عملك ؟


بدأت الحمد لله اتوسع فى شغلى وبإسلوبى فى الحوار مع الناس وانى اخد كل فرح على جوه واعامل الناس بالطريقه اللى يحبوها
بدأت اسمع فى كل انحاء المحافظة
مش بزعل حد
بعمل افراح لكل الطبقات وكله بيتعامل عندى نفس المعاملة
اللى ظروفها على قدها زى اللى مكلفه فى افخم قاعه
كله بيفرح وبيتراضى معايا
والحمد لله بخرج من الفرح معايا مش اقل من حجزين


ودلوقتى بمسك حجزين فى اليوم ومعايا بنات بتصور وبتقف على الدى جى
وكلهم من تعليمى بس فى ناس بتشترط تواجدى فى الفرح لانهم عارفين انا بعملهم ايه
مش معنى انى فرد لوحدى واقفه على الدى جى يبقى البرنامج ممل بالعكس كل حفله ليها برنامج مختلف عن الحفله التانيه والفقرات طبعا مختلفه عن كل حفله



وعملت فقرة خاصة جداااااا للعريس لما بتكون العروسة مش منقبه محمد جوزى بيدخل مع العريس واهله الرجاله بيعملهم جو وانا ببقى مع البنات بالمايك بتاعى وهو مع العريس بعيد بالمايك بتاعه


وطبعا الاغانى بيتم الاتفاق مسبقا عليها مع العروسة وحسب رغبتهم علشان نرضى كل الاطراف


وبقيت أول ست فى دمياط تبقى صاحبة دى جى
وبنافس اصحاب ديجيهات لهم باع طويل فى المجال ده وأسماء مشهورة
واللى هما حققوه ف 10 سنين انا حققته فى سنتين


وطبعا مفيش مجال بيخلو من المنافسه
لكن والحمد لله ليا بصمتى وليا زبونى اللى بيدور عليا ويعرف كمان يوصلى



وبالنسبة للتعامل
انا بتعامل مع الحريم فقط وزوجى وكيل اعمالى وهو اللى بيتعامل مع الرجاله وبينسق لى مواعيد شغلى وهو اللى بياخد اوردرات الشغل وهو اللى بيحدد الاماكن اللى نروحها


طبعا دعايتى فى شغلى هو شغلى نفسه
الناس دلوقتى مبقيتش عبيطه الناس دلوقتى لما بتيجى تدفع فلوس عارفه هى بتدفعها فى ايه وهتاخد بيها ايه


وكمان وقفه جوزى جنبى وفى ضهرى هى اللى عملت منى اسم برضه
من اول الزمان هو اللى اخد بإيدى ودفعنى للأمام
وده فضله عليا من بعد ربنا طبعا



كيف كانت بدايتك فى منتدانا ؟؟

وطبعا المنتدى ليه فضل عليا مش قليل علشان اغفل عنه
بدايتى مع المنتدى من على جوجل وانا ببحث عن اناشيد خاصة بشغلى
وبدأت اتصفحه كزائرة فترة
وبعدين قررت انى اعمل عضويه وادخل قسم المول واعرض شغلى والحمد لله
لاقيت اقبال كبير منالبنات والستات هنا وكلهم شجعونى
وبدات اعمل افراح لبنات وستات هنا
وكلهم والله ذوق انو يقدمو شكرهم بموضوع رقيق يمدحو فيه لشغلى وانا فخورة جدا بمواضيعهم عنى وحطيتها تحت توقيعى
من شدة سعادتى بيها
وفيه بنات وستات كمان من دمياط قابلونى فى افراح بالصدفه ومكانوش يعرفو انى ام رؤى حماده اللى معاهم فى المنتدى الا لما شافونى وشافو توقيعى
والحمد لله مقابلتش حد الا ودعالى دعوه حلوة
زوجى حماده كان عنده حق لما ذكرنى بقوله تعالى
( ان الله لا يضيع أجر من أحسن عملا )
ودى حكايتى اللى انا فخورة بيها جدااااا
حكاية
أول ديجيهايه حريمى بدمياط



احب انى اقول كلمة لكل البنات والستات
( مش عيب اننا نشتغل شغله محترمة وشريفه تعود علينا بأجر ينفعك لو بنوته تجهزى نفسك وتجيبى اللى نفسك فيه وتشيلى عن ماما و بابا شويه ولو ست تساعدى زوجك فى متطلبات الحياه
لكن العيب اننا نقعد فى البيت ننهى ونتشرط وكمان نتأمر)


( الست دلوقتى خاضت كل المجالات بلا استثناء الست دلوقتى قاضيه ومأذونة وكمان داعيه وانتى ايه وعايزة تبقى ايه؟؟؟ )


[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://www.facebook.com/profile.php?id=1080527782#!/group.php?gi
محمد حماده
Admin
Admin


ملك المنتدى
عدد المساهمات : 194
الموقع : دمياط

مُساهمةموضوع: رد: أم رؤى حماده أول ديجيهايه حريمى بدمياط   الثلاثاء 21 ديسمبر 2010, 2:54 am

و لمزيد من التفاصيل حول قصه نجاح
اول ديجيهايه فى دمياط

ام رؤى حماده

ولنتعرف عليها اكثر
وجهت لها هذة المجموعه من الاسئله

1-من وجهه نظرك ماهى مقومات نجاح من يعمل فى هذا المجال ؟

المهنة دى مش اى حد يشتغلها
ومحدش يستقل بيها يعنى ايه احط اسطوانات وخلاص لاء !!
مش كده خالص
دى محتاجه ان يبقى عندى درايه بكل ما يخص الغناء والإنشاد
ومطلوب انى اعرف كل الاغانى الموجوده فى الساحه ايه
و اعرف ازاى انسق الاغانى
امتى اشغل دى وامتى مشغلهاش خالص
ازاى اعرف اميز شغل الدى جى عن شغل الفرق
ازاى اشد الناس واحسسهم ان الدى جى ده ممكن يعمل احلى من الفرق اللى موجوده
وكمان ابقى عارفه الفرق الموجوده فقراتها ايه واتميز عنها
اعرف عيوبهم ايه واتفاداها فى شغلى
ده غير ان لازم يكون الاسلوب لبق فى التعامل مع الناس
انتو عارفين فى الفرح كام نوع من البشر والمطلوب منى اتعامل مع كل نوع بطريقته
ويكون صدرى رحب اتقبل النقد واطورة لمصلحتى
اخد كل فرد موجود على جوه
مفرضش رايى على حد
اللى جايبنى دافعلى فلوس وعايز بيها خدمه
يتفضل وياخد خدمته على اكمل وجه
لان التقصير فى شغلتنا دى سمعه وحشه طبعا وبتقصر علينا
لان زى ما قلت
الدعايه فى شغلتنا دى بالشغل نفسه



وما المصادر التى تعتمدى عليها لتطوير العمل؟

المصادر اللى بعتمد عليها فى شغلى
طبعا النت
و لما اتعزم فى فرح لازم اروح علشان اعرف الدى جى ده هيدور الحفله ازاى
وكمان الفيديو بتاعى
لما بيصور حفله لفرقه مثلا وانا بشطب الشغل اخد بالى هما عملو ايه وكان رد فعله ايه واتعلم منه
وطبعا الجمهور
ايوه الجمهور
فى كل حفله بيظهر حاجه جديدة وطلبات جديدة
لما انا اخد بالى منها واعملها من غير ما تطلب منى فى حفله تانيه ده بيعتبر تطور فى نظر الجمهور




2- مانظرة الاهل والاصدقاء ليكى كامرأه تدخل هذا المجال المعروف انه قاصر على الرجال خاصه فى محافظه مثل دمياط؟

والدى كان مشجعنى وكمان جوزى شجعنى ودفعنى للأمام
والدى شجعنى لانه عارف ان عندى طموح جامح
وعارف انه ربى بنت ب 100 راجل وتسد فى اى مكان
وجوزى شجعنى لانه وكيل اعمالى وبرضه عارف ومتيقن انى عمر ما هخطى خطوه من غير علمة لانه ادرى واحد بمصلحتى
ووالدتى بتحبلى الخير
و كمان كانت سيدة عامله وقفت جنب والدى من الصفر
فاتعلمت منها يعنى ايه الست تكون دراع جوزها اليمين
الدراع اللى ميستغناش عنه اى مخلوق فى قضاء حاجاته

ونظرة الناس ليا مقدرش اوصفها
عارفين يعنى ايه تبقى واقفه فى فرح وانتى سبب سعادة الناااااااس دى كلها
عارفين يعنى ايه لما تجيبلى ست كبيرة وبنت مسنداها وتيجى علشان تبوسنى وتدعيلى ربنا يكرمنى ويوفقنى ويسعدنى ويباركلى فى بنتى وتدعى لجوزى وتقوله ربنا يباركلك فى مراتك
وتبكى من عز ماهى بتدعى من قلبها وشدة سعادتها وتقولى انا عمرى ما فرحت اد النهارده
تخيلو انتو انا اعمل ايه
ابكى من شده سعادتى انى فعلا نجحت
نجحت لانى أأثر فى الناااااااس دى كها



3-ما اصعوبات التى تواجهك فى عملك وكيف توفقين بينه وبين شئون بيتك وابنتك باعتبار ان له طبيعه خاصه غير باقى الاعمال؟

الصعوبات اللى واجهتنى كتيييييييييييييير
وخصوصا انى بتحارب من كذا جبهه
بتحارب من بتوع الديجيهات وكمان فرق البنات
مع انى مش جايه اخد رزق حد ربنا اللى هيقسملى رزقى وانا راضيه بيه اللهم لا اعتراض
بتوع الديجيهات الرجاله
* جه مرة واحد صاحب دى جى ووصلى توصيله غلط وكان هيطيرى كل السماعات
* واحد تانى مرة زبون راح يطلبنى منه عمل نفسه بيتكلم فى التليفون وقاله مش فاضيه اليوم ده
*واحد تانى صاحب قاعه راحت زبونه تحجز فرح وقالته انا عايزة ام رؤى قالها حاضر هكلمهالك وطلبتنى قبل الفرح بيومين بالظبط علشان تأمن عليا قولتها معنديش اوردرات باليوم ده وانا اليوم ده عندى 3 شغلات مش هقدر اقبل اكتر من كده
واتفجأت يوم الفرح انهم جايبينها دى جى راجل ولما عملت عبيطة وسألت عنى قالولها اتأخرت فى السكه واحنا اتصرفنالك واتقلب الفرح شعبى مختلط
بتوع فرق البنات بئه
* مرة مكانش عندى شغل دى جى فطلعت اصور حفله ولما شافتنى صاحبة الفرقة
مسكت المايك وقعدت تنادى وتزعق الديجيهات حراااااااااااااااام ومفيش ديجيهات اسلامى
واناس بتضحك عليكم وياااااااااااه على اللى قالته وانا واقفه اصور ولا كأنى سامعه ولا كأنى من هنا اصلا المهم اليوم ده الناس كانو حاجزين دى جى راجل مامت العروسة قالتلها خلصتى زعيق يلا بئه علشان نشغل الدى جى ومشوهم من الفرح واشتغل الدى جى

فى منافسه طبعا فى مجال العمل
مع انى ليا شغلى ولونى وهما ليهم شغلهم ولونهم
واللى عايز ده بيجيبه واللى عايز ده بيعرف ازاى يجيبه
كتيييييييييييير اللى بشوفه فى الشغل ده لكن انا مبدأى
( كن كالنخيل يرمى بالصخر فيلقى اطيب الثمر )

بالنسبة لبنتى
انا ساكنه فى دمياط الجديدة وامى ساكنه فى دمياط يعنى كل شغله بنزل من بيتى اروح اودى بنتى عند ماما وبعدين اروح شغلى وبعد ما اخلص ارجع تانى عند ماما واجيب بنتى ونروح
طبعا كل ده وجوزى معايا خطوة بخطوة
مش بمشى لوحدى خااااااااالص
4- كيف تتعاملين مع مشاكل التنافس فى مجال العمل مع اصحاب الدى جى الرجال؟

بكبر دماغى خااااااالص
ومش بسكت لحد هما مفكرين انى علشان ست ممكن اسكت ؟ لاء
انا بقول للاعور انت اعور وفى عينه
مبخافش من حد غير ربنا
وطالما جوزى جنبى وموافقنى ببقى مطمنة فى اى قرار بتخذه او اى خطوه بخطيها



يتبع


[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://www.facebook.com/profile.php?id=1080527782#!/group.php?gi
محمد حماده
Admin
Admin


ملك المنتدى
عدد المساهمات : 194
الموقع : دمياط

مُساهمةموضوع: رد: أم رؤى حماده أول ديجيهايه حريمى بدمياط   الثلاثاء 21 ديسمبر 2010, 3:00 am

نتابع لقاءنا مع
ام رؤى حماده
اول ديجيهايه حريمى فى دمياط


5- كيفيه حسابك وتقديرك لمجهودك فى عملك بتتم على اى اساس؟؟
زى ماقلت قبل كده اجهزتى رأس مالها من امى
وده دين فى رقبتى
فكل شغله بعملها ليها فيها جزء
وطبعا انا كا صنايعيه واقفه على الجهاز ليا اجرى
وطبعا فى ناس بتشيل ليها اجرها
وعربيه نقل الدى جى ليها اجرها
وزوجى له اجره كمنظم ومسئول دعايه وحجز
وطبعا بشيل جزء علشان هالك العده وده علشان اى حدث لا قدر الله يبقى فى فلوس اصلح بيها عدتى وان مكانش اطور بيها وازود سماعات
وده من كل شغله بتتقسم الحسبة دى وكله بياخد اجرة
اعمالا بحديث رسولنا الكريم
( إعط الأجير أجره قبل ان يجف عرقه )



-هل فكرتى فى مديرة اعمال لفرقتك؟

مينفعش اتنين ستات فى شغلتنا دى مع بعض
ليه
هيغيرو من بعض والنفس أمارة بالسوء
ده انا جبت مرة بنت اشغلها معايا حبت جوزى
اه والله حبته
وعيشت نفسها فى الدور وجابت دبلة كتبتها باسمة وخلت واحده صحبتها تكلمه وتقوله فانه بتحبك وبتموت فيك
هههههههههههههه
وكل ده فى اسبوعين
مع ان الراجل والله ما له اى تعامل مع البنات خالص
انا مع البنات وهو مع الرجاله
وكمان فى شغلتنا دى مينفعش غير جوزى وكيل اعمالى لانى رجله على رجلى منعا للقيل والقال
لان شغلتنا دى كلها رجاله والكلمة الصغيرة دلوقتى بعد ساعه بقت قصه ومستنيانى تحت باب بيتى
ههههههههههههههههههه



- هل لو عاد بك الزمن للوراء واتيحت لك فرصه عمل فى تخصصك هاتتخلى عن الدى جى ؟؟



لاء طبعا
الدى جى ده مهنتى
وعمرى ما هتخلى عنها
لانى محبتش ولا لاقيت نفسى الا فيها
وحققت فيها طموح عمر ما ست هتقدر تحققه
كفايه اللقب اللى بيطلق عليا
(أول ديجيهايه حريمى بدمياط )
عمر ما حد هيقول عليا اول مدرسة بدمياط
ولا اول اخصائيه اجتماعيه بدمياط



-ما هى توقعاتك لمستقبل مهنتك؟

الإستمراريه
احنا فى مجتمع بيحب كل حاجه جديدة وغريبه
وطول ما انا بطور وعندى جديد
هفضل موجوده واسمع كمان وكمان




9-ماهو طموحك لفرقتك ؟

طموحى
!!!!!!!!!!
الإنسان بطبعه طماع
كل ما يحقق هدف يفضل يجرى لغايه ما يحقق هدف تانى
وتالت وهكذا

لسه عندى طموحات كتير محققتهاش

تعرفى ان فى ناس بتطلبنا من دول عربيه علشان يحجزو افراحهم فى محافظات داخل الجمهوريه
علشان لما ينزلو تبقى كل حاجه جاهزة
تعرفى كمان ان جالى عقد عمل فى سلطنة عمان وانا اللى رفضت
علشان اسمى وسمعتى هنا محدش يركب عليهم
تخيلى ضحيت بايه علشان لقبى

عندى حلم ولازم هوصله هوصله

زى ما كنت
أول مصورة فى دمياط تشتغل على كاميرا كبيرة
وزى ما كنت
أول ديجيهايه حريمى بدمياط
عايزة ابقى
أول ست صاحبه ستوديو تصوير حريمى بدمياط ولا يعمل بالمحل رجال
واجيب احدث كاميرات تصوير فوتو فى الصاله واحدث اجهزة الطبع والتحميض
وبعد كده ابقى حققت كل احلامى
الا اذا لم يجد جديد



[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://www.facebook.com/profile.php?id=1080527782#!/group.php?gi
محمد حماده
Admin
Admin


ملك المنتدى
عدد المساهمات : 194
الموقع : دمياط

مُساهمةموضوع: رد: أم رؤى حماده أول ديجيهايه حريمى بدمياط   الثلاثاء 21 ديسمبر 2010, 3:07 am

نتعرف سويا على الادوات التى تستخدمها

ام رؤى حماده

فى مهنتها

ده ميكسر وبيتش

[ندعوك للتسجيل في المنتدى أو التعريف بنفسك لمعاينة هذه الصورة]



ده شكل العده فى اول حفله ليا بيها
كنت بادئه بتلاجتين بس (سماعتين ) كل واحده فى داخلها طبقين سماعات يعنى الاتنين باربعه سماعات

[ندعوك للتسجيل في المنتدى أو التعريف بنفسك لمعاينة هذه الصورة]



ده الباور

[ندعوك للتسجيل في المنتدى أو التعريف بنفسك لمعاينة هذه الصورة]



ده شكل التقفيله
بيتش قطعتين + ميكسر + باور

[ندعوك للتسجيل في المنتدى أو التعريف بنفسك لمعاينة هذه الصورة]



ودى شكل سماعه منهم ( تلاجه )

[ندعوك للتسجيل في المنتدى أو التعريف بنفسك لمعاينة هذه الصورة]


[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://www.facebook.com/profile.php?id=1080527782#!/group.php?gi
محمد حماده
Admin
Admin


ملك المنتدى
عدد المساهمات : 194
الموقع : دمياط

مُساهمةموضوع: رد: أم رؤى حماده أول ديجيهايه حريمى بدمياط   الثلاثاء 21 ديسمبر 2010, 3:08 am

[ندعوك للتسجيل في المنتدى أو التعريف بنفسك لمعاينة هذه الصورة]


[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://www.facebook.com/profile.php?id=1080527782#!/group.php?gi
@سوسو@
مشرفة متميزة
مشرفة متميزة


مراقب مميز
عدد المساهمات : 749

مُساهمةموضوع: رد: أم رؤى حماده أول ديجيهايه حريمى بدمياط   الثلاثاء 21 ديسمبر 2010, 1:15 pm



[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
 
أم رؤى حماده أول ديجيهايه حريمى بدمياط
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: دى جى رؤى :: من نحن-
انتقل الى: