بفرخه واحده ازاى تعملى بانيه وشيش طاووق وشاورمه ورز بالخلطه ووجبه كنتاكى

نيجى بقى للفرخه..........
بصى ياستى انا بجيب فرخه بتكون كبيره واقسمها نصين بالعرض يعنى الصدرين لوحدهم والوركين لوحدهم
اخد الصدرين وافصلهم واخلى العضم وبيبقى عندى لحم الصدر ده الى بعمله البانيه رفيع او تخين على راحتك بس الوسط احسن
وفى الصدر حيتبقى الرقبه وعضم الصدر والاجنحه اوعى ترميهم حقولك نعمل فيهم ايه
بعد كده نيجى للوركين ونصلهم ل4 قطع يعنى الدبوسين والفخدين
حناخد الدبوسين مع الجناحين ونسلقهم نصف سلقه ونتبلهم بميه البصل والبهارات ونحطهم فى الدقيق والبيض ثم البقسماط ودى وجبه كنتاكى مع شويه بطاطس وسلطه كول سلو
بعد كده الوركين تفصلى اللحم عن العضم وتقطعيه قطع صغيره وتبليها ومع قطع الفلفل والبصل والطماطم ام 10ج وعلى سيخ وعلى الشوايه بقت شيش طاووق
نيجى بقى للعضم الصدر والورك ده تنضفيه كويس جداااا ومهما تكونى مش شايفه فى لحم حيطلعلك كميه كويسه والله لما بكون رايقه بفصص الرقبه واطلع منها اللحمه الى فيها ,تخدى اللحمه دى كلها وتبليها وبقت شاورمه
العظم الى اتبقى برده مش حسيبه لازم ابهدله اكترمن كده حنعمل بيه حبه شوربه جامدين تعمليهم ملوخيه تقضى بيها يوم جمب فلفل مقللى وسلطه طماطم من ام ايه ...... ها قولوا شاطرين من ام 10ج
وفى فكره كتبتها فتوكه من جلد الرقبه انك تحشيها رز وتقفيليها وتسلقيها مع العضم بتاعنا ولما يستوى تحمريها فى سمنه.. بجد هايله انا نفسلى الى مابرحمش الفرخه كنت برمى الجلده دى
اخر حاجه الكبد والقوانص تقطعيها وتشوحيها فى بصل مع سمنه وتعملى بيها احلى رز بالخلطه
انا اسفه للاطاله بس كنت عايزه اشرحلكم بالتفصيل بس انا مش بعمل فرخه واحده انا بصراحه بجيب فراخ الشهر سواء 3 او 4 او 2 وبعملهم مره واحده عشان تبقى الكميه كبيره وكمان عشان اتبلهم مره واحده واحطهم فى الفريزر راطلعهم على الاستخام على طول
يارب تكونوا استفدتم منى وياريت اعرف رايكم والى عنده فكره يقولها

ايه الافكار الهايله دي ايوه كده اتحفينا